හෙළ සංගීත මඟ හෙලිකළ ඔහු

Posted by Unknown on Saturday, August 24, 2013 0

ඔහු බිහි නොවන්නට අපේ ‘ජන සංගීතය’ වැළලී ගොස් බොහෝ කල්ය.1922 පෙබරවාරි 17 වැනි දා හරිස්පත්තුවේ ඉඩමේගම ග්‍රාමයේ දී උපත ලැබූ විලියම් බණ්ඩාර මකුලොලුව සංගීත ක්‍ෂේත්‍රයට විශිෂ්ට සේවාවක් සිදුකළ මහා ගාන්ධර්වයකු වූයේය.

මෙරට ජන සංගීතය වෙනුවෙන් මුළු ජීවිත කාලයම කැප කළ මකුලොලුව මහතා ඉන්දියාවට ගොස් හොඳින් ශාස්තී‍්‍රය සංගීත අධ්‍යාපනය ලත් පසුව සංගීත ගුරුවරයකු, කථිකාචාර්යවරයකු (ඉන්දියාව) සංගීත පරීක්‍ෂකවරයකු හා සෞන්දර්ය අධ්‍යාපන අධ්‍යක්‍ෂවරයෙකු ලෙස තනතුරු ගණනාවක් හෙබවුව ද එම කාල වකවානුවේදී ඔහු ‘දේශීය සංගීතය’ හෙවත් අපේ ජන සංගීතය වෙනුවෙන් කර ඇති සේවය විමර්ශනය කිරීම ප්‍රසංශනීයයි.ඔහු සංගීත පරීක්‍ෂක තනතුරේ රාජකාරි කටයුතු බාරගත් මොහොතේ සිට සංගීත විෂය ක්‍ෂේත‍්‍රයේ නව පිටුවක් පෙරළිණි.පාඨශාලීය විෂයක් වශයෙන් සංගීතය අධ්‍යාපන ක්‍ෂේත‍්‍රයට ඇතුළු කිරීමට ලයනල් එදිරිසිංහ මහතා පුරෝගාමී වූවා මෙන්ම, එදා පාසල් සංගීත පාඨමාලාවේ වන්නම්, සීපද යන යන දෙකට පමණක් සීමා වී පැවැති සිංහල ගීත ක්‍ෂේත‍්‍රයෙහි ජන නාද ක‍්‍රම සොයා ‘සිංහල ජන ගී’ ඇසුරෙන් නව සංගීත පාඨමාලාවක් සකස් කළේ ද මෙතුමා විසිනි.
ලංකාවේ 500 ක් පමණ සිටි සංගීත නැටුම් ගුරුවරුන් සඳහා සංස්කරණ සම්මේලන රැසක් සංවිධානය කිරීමට ද එතුමා සමත් විය. එමගින් ගුරු පුහුණු වැඩමුළු රාශියක් සාර්ථක විය. ලංකාවේ ජන ගී ඇසුරු කොටගෙන ගුරු භවතුන් සහභාගි කොට ගනිමින් වාදක මණ්ඩල පුහුණු කොට ජන ගී නාදමාලා ඇසුරු කොට ගෙන ‘ගොයම් දා මඟුල’, ‘මාර පරාජය’, ‘හිරගෙයින් මරුමුවට’, හා ‘මහභිනිෂ්ක‍්‍රමණය’ ආදී ය එළිදක්වන ලදී. ඒ සඳහා බටහිර සංගීත භාණ්ඩ ද අවශ්‍ය පරිදි යොදා ගත්තේය. ඒ අනුව ජාත්‍යන්තර වේදිකාවේ  පැසසුමට ලක්වී ඇති දේශීය  සංධ්වනි ක‍්‍රමයේ පුරෝගාමියා ද ඔහුය.ශී‍්‍ර ලංකාව නියෝජනය කරමින් හෙළ සංගීතය පිළිබඳව ලොවට කරුණු වටහා දීම සඳහා ඔහු එංගලන්තය, රුසියාව, ඇමෙරිකාව ආදී රටවල පැවති ලෝක මහා සංගීත සම්මේලනවලට සහභාගි විය. ඒ සඳහා මුල් කොටගත් ලංකාවේ පාරම්පරික ගැමි ගීතයන්ය.

ඔහු විසින් ශී‍්‍ර ලංකාව පුරා විසිරී ඇති ජන ගී රාශිය විධිමත් ලෙස සංවිධානය කොට ඒවා නව වර්ගීකරණයට භාජනය කොට ගනිමින් ප‍්‍රස්ථාර ගත කොට ‘හෙළ ගී මඟ’ නම් උසස් කෘතිය 1962 දී එළිදක්වන ලදී. මෙහිදී සිංහල ජන ගී සඳහා පදනම් වූ සිංහල ‘තිත් තාල’ පද්ධතිය ද ක‍්‍රමවත්ව සකසා ගත්තේය. සියලුම තාල ‘තිත් ක‍්‍රමය’ මත පදනම් කොට ගෙන තාල දෙතිසකට වර්ග කොට ගැනුම අතර එම ප‍්‍රස්ථාර ක‍්‍රමය බෙහෙවින් ප‍්‍රචලිත විය.භාරතයේ ශාන්ති නිකේතනයේ දී ගායනය, වාදනය, නර්ථනය, හදාරා සියරට පැමිණ මෙරට අධ්‍යාපන ක්‍ෂේත්‍රයට සංගීත විෂය මුසු කොට විවිධ ආයතනවල පරිපාලන තනතුරු දරා ජන සංගීතයේ මං පෙත් හෙළි පෙහෙළි කර 1984 සැප්තැම්බර් 08 වැනි දා ඔහු දැයෙන් සමු ගත්තේය.